- فخامة الرايس بوتفليقة، فيك مانزيد ندير الثقة، 15 سنة حكم فاشل للبوتيكة، هلكتنا الله لا تربحك بسياسة مداحات الزنيقة، وكعادتو سي عتيقة، يديرلنا التقشف بمسح ديون رجالتو من العرب والأفارقة.

- خوه السعيد نصب روحو ولي عهد وأمير، بعد ما نهب بزاف ملايير، استثمرهم بالدوفيز والدنانير، باش سيطر على عدة دواوير ... أما بعد ماجات الأزمة بعت سي سلال يطلب التضامن من معشر الفقاقير.

- القايد صالح يموت على لحم الغزال، وشحال يكره عبد المالك سلال، يسَّقي الكسكسي... بعسل نحلة الجبال، ويبغي الشيخة كل ليلة خميس بالطرب والموال.

- الجنرال توفيق، رب الدزاير عمرو ما يثيق، الرجال نتاعو برك اللِي يفتحولو الطريق، وغير صورة الهامل التلمساني هو ما يطيق.

- الوزير الأول سلاليل، اللِي لاعبها علينا بهاليل، مرتو فريدة ملكت جبال الأهقار، وينتو ريم تسير في شركات كبار، من حيدرة إلى لندن الهدرة بالمليار، وأنت كحل يا الـGـليل.

- الوزير العادي خدمتو يراسل ديوان عتيقة، يحب التحواس والسفر باش ينحي الديقة، قدام الإعلام فنان وموهوب ويضرب الشيتة، والدولة راهي تصرف عليه وتخلص في تكاليف الطرونسبور والمبيتة.

- السيناتور كي الطير معشش في الغرفة العليا، الصفة نتاعو ديما سامية، ما تمسو سياسة التقشف ولا هموم الدنيا.

- البرلماني ياك ديمة نعسان، ومرة على مرة يهز يدو باش يبان، أما تفكيرو راه مركز على بوابر المانجا والبنان.

- الوالي الله يرحمو في ديك الرقدة، والي ولاية عنابة سي "محمد منيب صنديد" الزندة.

- شاف الدايرة الفنيان، عندو فيلا وشيفور وسيارة نيسان، مرة في رينْيُو ومرة تعبان، تقدر تولي غدوة يا الشعب الغلبان.

- خونا المير ما ينزلش من سيارة السارvـيس، يتقشف وراح فيه الـvـيس، تبالي حتى هو معوّل يركب في طيارة الإير بيس (الهجرة).

- أما أنا الفقور، في البطالة راني ندور، ماعندي علاش نتقلق ونثور، راني نحوس برك على فيزا في باسبور، باش نشد البابور اللِي راح ياخدني لبلاد النور.
 

مسعود زغودة