السلام عليكم خاوتي خوكم الشاوي من باتنة حاب نوصل ميساج لكل الجزائريين خاوتي راكم تشوفو لبلادنا كيفاه لعبو بيها الحركى بعد ماحرروها الرجال .. والله القلب يبكي على هذ الحالة لي وصلو بيها الجزائر ياخاوتي الجزائر ماتو على جالها رجال دمهم غالي علينا وضرك حاكمينها ولاد فرنسا لي زادو في وجدة هذو لي كي عرضو عليهم الحكم في 95 هربو كي لفيران للخليج وسويسرا حتى جاو الرجال الليي لباو نداء الواجب و نقذو البلاد وتخلاو على الحكم في وقت الناس كامل تطمع فالكرسي وجاو السراقين و الطحاحنة لي يقيمو المراة على الراجل ومانيش نقصد نهين نسا حاشا حراير بلادنا كانو بقيمتهم و مازالو منهم بصح والله راهم يحشيولهم بحقوق المراة لي هي فالحقيقة اهانة للمراة التي اعزها الاسلام باخلاقها وحياءها واذلوها هم بالتعرية والحرية المزيفة ..خاوتي لوكان نحكي نهار كامل على نذالة وحقارة هذا النظام مانكملش ... ...

المهم خاوتي لي حبيت نوصلهولكم الناس اللي فالسلطة والله ماهي صاحية وماهي سامعة بالشعب لا حي لاميت هدفهم الوحيد الكرسي و المال ولو على حساب ارواح الشعب وكي توصل الانتخابات يديرو رواحهم هذيك الساعة يحبو الشعب ويقتلونا بالشعارات النفاقية اللي ماعندها ختى معنا في قلوبهم لانهم اصلا ماعندهومش قلوب والله الحيوان ارحم منهم ..جزائر الغد ..جزائر العزة و الكرامة جزائر مستقرة و آمنة .. الخ من الشعارات اللي الشعب كره منها لانو عمبالو ماخليتو لا عزة ولا كرامة للجزائر و الاستقرار لي جابوه الرجال لي ماتو فالجبال ولي تخلاو على الحكم راه بدا يتهدد و يتزعزع بسبب هذا النظام الخائن للارض و الشعب .... ....

خاوتي بغيت نقولكم باللي المسيرات السلمية لازم تتواصل في كل ارجاء الوطن مايحشيولكمش بالفتنة لانهم هم راس الفتنة الحقيقي ومايحشيولكمش بأعداء الوطن لأنهم والله العظيم هم العدو الوحيد والحقيقي للشعب وللجزائر الحبيبة .. الجزائر بلد التضحيات ولطالما كانت كذلك كما اخرجنا فرنسا سنخرج كلابها ان شاء الله لازم نتوحدو ونكونو يد وحدة ضد هذا المرض الخبيث لي ينخر في بلادنا ... بزايد الشعب سكت خوفا على الجزائر لكن لازم ضرك ينوض بطريقة حضارية حبا في الجزائر كيما صرا في باتنة الناس كامل تشهد بنجاح المسيرة وشي هو لازم تتواصل وتكون توعية شاملة وتعاون شامل بين أبناء الجزائر لانقاذ البلاد من ايادي الغدر و الفساد ... طولت عليكم سامحوني الله غالب قلبي ضرني على بلادي كيفاه لعبو بيها اللي مايستاهلوش يعفسو حتى على ترابها والله . .//

تحياتي لكم . . سلام  خوكم شاوي